PRESIDENTEEN GUTUNAK

Zenbaki biribiletan, Korporazioak 11.000 M€-tik gora saldu zuen, 70.000 pertsona baino gehiagoko plantillarekin, eta 593 M€-ko mozkina lortu zuen, errekorra. MONDRAGONeko lau arloek (Industria, Finantzak, Banaketa eta Ezagutza) bilakaera positiboa izan zuten. Beraz, ondoriozta daiteke gure kooperatiba guztiek nota onarekin gainditu dutela ekitaldi zail hau, geopolitikak eta horrek ekonomia eta merkatuen bilakaeran duen eraginak baldintzatuta bada ere.

Bilakaera kuantitatiboaz gain, 2023an azpimarratu beharreko beste alderdi bat Ezagutza Dibisioaren eraketa formala da, ikastetxeek, unibertsitateak eta zentro teknologikoek osatzen dutena.

Azken batean, oso balorazio positiboa egiten dugu 2023ko itxierari buruz, eta gaur egun lantzen ari garen proiektuek datozen urteetan fruituak emango dituztela sinetsita gaude. Aurrera!

MONDRAGONek 2023an izan duen bilakaerak bere eredu sozioenpresarialaren indarra berresten du. Askotariko proiektuen ekosistema bat, kooperatiboa, merkatuetan lehiatzeko eta enpresa egiteko beste modu baten balioa nabarmentzeko gai dena –inoiz baino beharrezkoagoa ekonomian eta gizartean–, pertsonen benetako protagonismoan, ingurunearekiko konpromisoan eta denontzako aurrerabidearen bilaketan oinarrituta dagoena.

Gure bide orriak gure nortasun kooperatiboa indartzeko, negozioak bultzatzeko, kanpora begira irekitzeko eta hainbat esparrutako lankidetzaren bidez aurrera egiteko neurriak proposatzen ditu. Nahi dugulako “munduko erreferente kooperatiboa izatea, lankidetzaren indarraren bidez gizartea eraldatzen duten pertsonekin, dimentsio humanoari, lehiakortasunari eta inpaktu sozialari dagokienez”.

Horixe da MONDRAGONeko kooperatiben ezaugarri bereizgarria, indarrak batzen dituztela gizarte justuago, berdinzaleago, inklusiboago eta jasangarriago bat modu eraginkorrean eraikitzeko. Eta hori guztia posible izan da, da eta izango da, elkarrekin egiten dugulako.