IKUSI GURE HISTORIA OSOA
Toda la historia
2021
Argi-ilunen urtea izan zen, eta, neurri handi batean, pandemiak baldintzatutako urtea, ekitaldiaren azken zatian berriro indartsu berpiztu baitzen. Iragarpen guztien arabera, pixkanaka normaltasuna itzuliko zela zirudien, baina bat-batean Omicron aldaera mundu erdian zabaldu zen, eta mamu zaharrak eta iragan berrieneko beldurrak barreiatu ziren. “Txertoa” urteko hitza izan zen – 2020an “konfinamendua” izan zen –, baina beste hitz batzuekin ere bizi izan ginen, hala nola “next generation” edo “mikrotxip” hitzekin, eta ahanztura kolektibotik termino ekonomiko kezkagarri bat erreskatatu genuen: “inflazioa”
Hala eta guztiz ere, negozioen bilakaerari dagokionez, ekitaldiko balantzea positiboa izan zen. Hain zuzen ere, salmentak suspertzez gain enplegu mailak mantendu ziren eta emaitzen zifra ona izan zen.
Bestalde, aipatu behar dira, halaber, Cikautxo kooperatibaren 50. urteurrenaren ospakizuna, Rosa Carabel Eroskiko zuzendari nagusi berriaren izendapena edo “Jose María Ormaetxea, toda una vida cooperativa” Esperientzia Kooperatiboaren sortzaileetako bati buruzko liburu biografikoaren aurkezpena. Era berean, Perseverance planeta gorrian marteratu zeneko urtea izan zen; eta Goimek ibilgailuaren antena fabrikatzen lagundu zuen, Sener ingeniaritzaren eskutik.
2022
Leire Mugerza MONDRAGONeko Batzorde Iraunkorreko eta Kongresuko presidente izendatuta hasi zen urtea. Javier Goienetxea ordezkatu zuen, hark 7 urtez betetako kargua hartuta.
2022a Ukrainaren inbasioak baldintzatuta egon zen, informazioei dagokienez, baina, halere, energiaren prezioaren igoera ikusgarriak, inflazio neurrigabeak eta munduko ekonomiaren bilakaeraren gaineko aurreikuspen negatiboek ere lekua egin zuten titularren artean.
Gure kooperatiba esparruan, albisterik aipatuena izan zen Oronak eta Ulmak MONDRAGONeko kooperatiba kide izateari utzi ziotela, abenduaren 16an egindako ezohiko batzar orokorren ondoren.
Enpresa dinamikak, beste behin ere, eta testuingurua konplexua izan arren, 2021eko hazkunde ildoan jarraitu zuen.
Era berean, 2022an MONDRAGON Hospitality aurkeztu zen; Enea 2022ko Diseinuaren Sari Nazionala izan zen; Mondragon Linguak eta Alecopek bat egitea eta kooperatiba bakarra osatzea adostu zuten, eta hainbat urteurren ospatu ziren: Soraluce 60, Embega 50, Ondoan 40, eta Mondragon Unibertsitatea 25. Zorionak!
2023
Tentsio geopolitikoek – Errusia-Ukraina eta Israel-Palestina gerrak –, abian diren trantsizioekin batera – digitala, ekologikoa eta sozioekonomikoa – eta aspalditik ezagutu ez dugun inflazioarekin batera, merkatuen ziurgabetasuna areagotu zuten. Guztia gorabehera, Korporazioaren negozio guztiek urtea positiboan amaitu zuten, eta horrek erakusten du kooperatibek egoera aldakorretara egokitzeko gaitasuna dutela.
Gainera, 2023an, Donostia Ekonomia Sozialaren hiriburua izan zen urtean, ekimen korporatibo berri bat abiarazi zen, MONDRAGON Health, zeinak osasunaren esparruko, esparru soziosanitarioko eta bioteknologiaren esparruko zazpi kooperatiba biltzen dituen. Era berean, Ezagutzaren Dibisioa ere jarri zen abian, ikastetxeek, unibertsitate batek eta zentro teknologikoek osatua, MONDRAGONeko ezagutzaren ekosistema indartzeko asmoz. 2023an albiste izan zen, halaber, Ekiola Mendialdea, Arraia-Maeztun (Araba), herritarrek eratuta energia ekoizten duen Euskadiko lehen kooperatiba zen-eta.
Ekitaldiaren amaieran jakinarazi zen jada Pello Rodriguez Zabaleta izendatu zutela MONDRAGONeko Kontseilu Nagusiko presidente. Iñigo Ucin ordezkatuko du karguan, eta 2024ko abuztuaren 1ean hasiko da bere zeregin berrian.
